2026年4月5日 復活節祟拜暨入會禮流程​

         我細個就係一個要面子，中意威威嘅人。因為唔知自己需要啲咩，所以咩都想要，結果努力咗但咩都得唔到，因為目標已經出錯。又成日都想搵啲嘢嚟跟，但自己揀嚟跟嘅嘢往往都係錯，唔係適合自己，最後又係咩都得唔到。

         同埋我將免費嘅恩惠呢樣嘢睇得好恐怖，因為我以前學畫畫嗰個師門同我講咩都係等價交換，得到術／靈感／他人幫助嘅同時自己如果唔還就會失去一啲好重要嘅嘢。同埋師門同我講，要跟一個老師學成咗一套先，先可以有能力融合其他嘢，但我永遠冇試過學成一套，因為冇人教得識我，結果而言我最後走嗰時都係學唔識畫畫。

         讀中醫時因為我自己要面子，被動，資源有限，所以學院啲老師都唔會特別想教我，同學都唔會特別想同我分享醫術，結果我咩都唔識就讀完咗個大學。因為覺得自己唔會學得識任何嘢、唔會有進步嘅可能，所以一開始入到公營機構做都係得過且過。

         但自從去咗教會個 camp 之後，有啲領受同再親近神多咗。上帝興起一個外邦人嚟改變我。就係公司一位新嚟同事，我叫佢做師兄啦。師兄就係我理想中嘅自己。佢係我心目中技藝高超，勤奮好學，樂善好施，唔介意個人得失同埋他人眼光去幫人同埋付出，喺醫術上又樂意主動分享。佢竟然話肯教我針灸推拿開藥，肯將佢喺師門 4 年寶貴內容分俾我。

         我為咗一邊完成手上工作一邊跟佢學嘢，我成為咗時間管理大師，無論開工定收工都做到隨機應變。我學會用盡自己本身嘅優勢去達到目的。因為機會珍貴，我次次都好認真睇同埋思考，同埋每個細節都會問到明為止。不過我同時間就會驚，諗唔到點還俾佢，拎乜嘢同佢交換，所以日日戰戰兢兢，感到焦慮。雖然佢話佢係不求回報唔使還，但以前畫畫師傅對我嘅影響太深。我唯有出盡渾身解數氹佢開心當還俾佢，可能因為我係用人嘅方式去解決，所以其實嗰種緊張同焦慮係冇減少過。

         另外同一時間同男友關係較差，因為佢當年唔俾我同異性來往，我同唔同同事又會喺收工時間透過 WhatsApp 有學術上嘅密切來往，同埋分享日常生活，有時又會放工時間一班人出去食飯玩，我唔敢俾佢知我同異性同事熟，所以少咗理佢。我喺教會同傳道人求助，結果傳道人幫助下我有返穩定教會生活同埋會依靠主，同時間主亦都喺呢段時間更新咗男友，更新埋我同佢嘅相處模式同埋關係，令我哋關係更好。最重要係我靠住上帝，去嘗試放下執著，將我嘅需要交俾神。

         之後我用朋友嘅態度去同師兄相處，但正正因為咁上帝不斷供應我，俾我諗嘅更多。自從我放低執著，唔再用以前好捉住嘅方式同佢相處，用朋友方式關心佢，同埋除咗醫術之外，師兄開始透過同我分享感受同埋日常生活改變咗我嘅價值觀。我學識咗欣賞一個人好嘅一面。我學識咗 less is more，我需要啲咩、唔需要啲咩，唔再去在意一啲唔重要嘅嘢。所以我睇嘢嘅角度係唔同晒。

         我學識咗放下面子，唔要面子就會有裡子。當有人讚我威威，我知道我有得威都係因為師兄免費教我，所以完全冇晒想出風頭嘅念頭。我學識咗謙虛，只係好愧疚我冇嘢幫得返佢。我學識咗自己先唔計較得失去付出，自己就會有所得著，因為自己都係免費學，所以都免費用落其他人度，結果成就咗好多人，自己都因為咁提高到醫術。除此之外，我想送禮物俾佢多謝佢，又唔想咁怪就送晒俾所有人，結果我就同所有人 frd 晒，外向咗好多，其他人更加願意互相分享醫術。

         同師兄以及其他同事相處嘅過程中，我學識咗講可喜悅嘅言語，學識點為之溫柔，學識咗醫病要醫埋人個心。我發現我只要唔係為自己，為咗其他人去做，反而得著最多。上帝都透過唔同途徑話俾我知要我放下自己，例如星期三嘅《爾道自建》，叫我唔再用自己嘅計劃，要行神嘅計劃。同埋只要為咗成就人而祈禱求神，上帝就會俾源源不絕嘅靈感我，我只要跟住做通常都會有好正面嘅果效。只要我按上帝俾嘅目標去努力，上帝就會有不絕嘅供應。

         回過神來我嘅醫術已經同其他同事溝通到了，啲病人都開始話有效。同埋我好似不知不覺過咗要跟死一個師傅嘅階段，好似開始可以將啲新嘢融合落去師兄嗰套，which is 我當年學畫做唔到嘅嘢。但我冇失去啲乜嘢，同當年畫畫師傅講嘅唔同，亦都印證咗基督嘅恩惠都係免費，因為耶穌已經透過死幫我哋還咗，唔使再有虧欠感，唔使再驚要還。

         上帝為咗裝備我使用我，透過師兄點一條啱嘅路我行，令我知道唔使再亂搵嘢嚟跟，跟上帝就係最終正確答案。所以就算第日同師兄講咗 bye bye，都有聖靈點條啱路我行，我唔使再怕行錯跟錯。我不知不覺中成為咗理想中嘅自己，就係勤奮好學，樂善好施，唔介意個人得失同埋他人眼光去成就人同埋付出嘅人。我好幸福。因為我本身想做嘅嘢都係上帝想我做嘅嘢，就係透過醫術榮神益人，帶人認識福音，認識終極嘅醫治者。

         師兄俾咁多好嘢我，我冇還到咩俾佢，福音係我唯一諗到最好嘅嘢俾佢，但佢心裡剛硬唔肯過嚟玩，但我係唔會放棄！！！